صدى الارز

كل الأخبار
مشاهدة متواصلة
إستطلاع
تقاريرنا
أرشيف الموقع
Podcast
إشتركوا في نشرتنا

بدي افهم!

بقلم : جورج يونس - كاتب و ناشط اجتماعي | لما واحد بقلك: "لبناني ما بينخاف عليه" فينا نعرف ع أيَ اساس؟ بندوق يعني؟

إنو اللبناني ما بينسرق؟ ايه حتى المصارف سرقتنا!
اللبناني ما بيقعد بلا شغل؟ ايه نص لبنان بلا شغل، وثلاث ارباع النص الثاني لوما بيتغربو كانو بموتو من الجوع، والربع الباقي عايش براتب بلا طعمه وع ضهر الاحزاب!
اللبناني ما بيتاكل راسو؟ ما نص اللبنانية مبطوحين قدام الزعما تيعيشو!
اللبناني بحب الناس؟ قد ما حبيناهم صار نص العالم نازحين ولاجئين عنا!
اللبناني كلمتو كلمة؟ وبسبب ثباتو ع مبادؤو كيف ما برم زعيمو بيبرم معو!
اللبناني ذكي؟ قد ما فِتِحْ طلعو ع ضهرو الزعما وما عاد نزلو!
اللبناني رائد بالطبابة والاستشفاء بالمنطقة؟ كرمال هيك صرنا عم منموت ع بواب المستشفيات والنخبة عم تهاجر!
اللبناني نموذج للديمقراطية؟ وقد ما نحن احرار ١٨ اقطاعي متحكمين فينا وبمصيرنا!
اللبناني ملك التعايش؟ ومن كثر محبتنا لبعض، عند كل مفترق مصيري منقتل بعض!
اللبناني طليع بالثقافة والتراث؟ لهيك صرنا مهووسين بالهشك بشك!
اللبناني مبدع؟ قد ما بدك إبداع بالتبعية والعمالة!
اللبناني عييش؟ لهيك المقابر عنا بطلت تساع!
اللبناني منظم؟ قد ما منظمين خزننا النيترات بنص بيروت!
اللبناني بحب بلدو؟ وقد ما بحبو حول جبالو لكسارات ومقالع وشطوطو لمكبات ومواقع ردميات!
اللبناني شاطر بالتجارة؟ كرمال هيك باع كل شي وبالآخر باع اللي فوق واللي تحتو!
اللبناني بحب السهر والافراح؟ ايه قد ما بحبهم صار عم يتفنن كيف يموت!
وإذا صار معكم وقت، انتو وعم تجربو تفهمو، تبقو مرقو ع وسط بيروت بالليل وشوفو كيف شوارعها فاضية وبالنهار ما تنسو تمرقو ع هياكل صوامع القمح عالمرفأ مطرح ما بعدو لليوم البحر ما بيعرف شو بدو يعمل بجثث ضحايا انفجار بيروت.
وبالأخر ما تنسو تذكرونا بصلاتكم.

تابعوا أخبارنا على Google-News

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *