شفتو شي حدا بالعالم تبنى وجعنا ومعاناتنا وقضيتنا؟ قولكم ما فيه منتفعين عنا بيقبضو ع ضهرنا كل ما حمسونا تنحمل علم غير دولة ونركض فيه ع هالطرقات؟ قولكم ما فيه غير دول مبسوطة لأنها بتشيل المصايب عنها وبترميها ع ساحتنا؟ قولكم اذا خسرنا كل شي حدا رح يسأل فينا؟ قولكم اذا متنا من الجوع وانتهينا حدا رح يتبهدل عنا؟
كم مرة صرنا خاربين حياتنا وبلدنا وكرمال شو؟ يا هل ترى لو كنا بغير بلد ومتزلمين لدولة تانية ما كانو حاكمونا؟ بتتذكرو بيروت قبل ما اتدمرت بإنفجار ما حدا عرف مين مسؤول عنو؟ بيروت بعدا لليوم ما اتعمرت كلها. بتتذكرو ال ١٧٠٠٠ مفقود؟
بعدا لليوم جثثهم ما التقت. بتتذكرو ال ١٥٠ الف اللي استشهدو كرمال القضية؟ طلعت القضية بطاطا والمستفيدين ع ضهرها صارو أثرياء حرب. بتتذكرو المباني ع خطوط التماس؟
فيه كتير منها بعدا مهجورة وما تعمرت! بتتذكرو ميات الالوف اللي كانو منا ومعنا واليوم صارو مهاجرين بدول العالم؟ بتتذكرو حساباتكم بالبنوك؟
ما حدا غير منظومة الانتفاع والدجل سرقها. بتتذكرو انو بالحرب الفقرا بس بموتو والمسؤولين بهربو ولادهم ليعيشو ويتعلمو برا؟ بتتذكرو ارضنا المحروقة بال ٧٥ وال ٧٧ وال ٨٠ وال ٨٢ وال ٨٣ وال ٨٨ وال ٩٠ وال ٩٦ وال ٢٠٠٦؟ لو ما كل هالمعارك كنا صرنا اليوم من أغنى دول العالم. بتتذكرو كم عيد مرق علينا بالملاجىء وبدون ما نحس بالفرحة.
نحن تعبنا وكتار منا تعبو عالأخر. إنتو بعد ما تعبتو؟
فكرو بس بلبنان. فكرو كيف نعملو جنة السما عالارض بعد ما الله عطانا كل هالجمال والفكر. صار وقت يكون لبنان للبنانيين وبس. بكفينا استيراد وتصدير أزمات ع حساب الاوادم والمسالمين بهالوطن وكأنو دماتنا ودمات ولادنا بلا قيمة ومرهونين بس لكم قريع، واتذكرو كل لحظة إنو ما حدا راح وأخذ شي معو.
فكرو منيح تنبقى.
