يا قمر مشغرة يا بدر وادي التيم. يا قارعة بواب القدس العتيقة، يا حكاية كل قهوة عالمفرق، يا صوت العدرا بالجمعة العظيمة، يا هاك الأخت ال قطفت مع كل هبة هوا لريما مشمشة، يا صدى صوت الصبية العم بتودع بيها هوي ورايح مع العسكر، يا ليلة العيد بأحلى عيد بالسنة، يا حلوة ال بتبشر بالحب ع مفرق دارينا، يا عيون الحبيب البعدو على بالك، يا صرخة حق بوج كل غاصب ومتسلط ومحتل مفرداتها “ما فيه حبوس تساع كل الناس”، يا طير اللي كل ما بيبعد بيرجع بيوقف معنا، يا عصفورة الشمس يا زهرة الحرية، يا ملكة الإيمان الساطع، يل الناطرة الخيالي ليرجعو من المعركة، يا حكاية حنا السكران ودكانة الحي، يا بنت مشتى الديب ع دروب سفر برلك، يا رفيقة عروستنا الحلوة هيي ومارقة على جسر اللوزية، يا حلوة البعدك على بالي، يا سنين البركي بترجعيلي، يا صوت هادر بإسم عاصمتنا عند.كل غيمة سودا “لبيروت”، يا سارقة عقولنا من عز النوم، يا شجرة الارز العالية الما بتطالا الايد، يا طالبي الخط لتحكي ستك البي كحلول، يا قصة طريق النحل. يا حكاية محبتنا لهالوطن ولكل نسمة هوا منو.
بعيدك منفتش على الكلمات، المكتوبي بحنين الذكريات الحلوة، وبغصة الغربة، وبوجع كل الايام الصعبة اللي عشناها وصوتك كان فيها دايماً معنا. بالفرح انتِ فرحتنا، بالأعياد انتِ صلاتنا، بالغربة انتِ ملجانا، بالحب انتِ نبضنا، بالوجع انتِ أملنا. بالوطنية انتِ آهاتنا، وبالحرب انتِ عنفواننا.
من هلق لتخلص الدني، ما بينذكر اسم لبنان بدون ما ينذكر اسمك، ما بيتمجد اسم الخالق الا بعظمة صوتك، وما بيحفر تاريخنا امجادو بدون كلمات اغنياتك الراسخة بضمير كل لبناني وكل محب للبنان بالعالم.
“فيروز” يل اسمك ضوا بكل الدني، بعيدك منصلي ل الله يحفظ لبنان ال حبيتي، وليطول بعمرك يا كل الحب. يا كل الحنين ويا كل الوطن.
